• انشر كتاباتك
  • احصل على آراء وتقييم آلاف القراء والكتّاب
  • طوّر مسيرتك الكتابية

سجل حسابك الآن وابدأ رحلة الكتابة!

إنشاء حساب تسجيل دخول
يوم عادي تافه و مقرف
يوم عادي تافه و مقرف
Google+
عدد الزيارات
1,741
باللهجه السوريه

الساعه وحده و اخيرا صار وقت الانصراف من المدرسه 

شنتايتو عضهرو و عم يطلع عالساعه و ستنى الجرس ليرن

اطلع حوليه و اذ كل الطلاب بوضعية الاستعداد كلون صامتين

بتفكرهن عم يستعدو لمسابقة الماراتون العالميه و عم ينتظرو 

صوت ضربة المسدس، بس ما في غير صوت المروحه المطعوجه و صوت استاذ الفلسفه يلي العرق عم يشر منو شر

عم يشرح درس ما حدى عم يفهم منو شي.. و الكل متأكد اتو بعد كم يوم ما حدى حيتذكر منو شي حتى الأستاد متأكد.. 

و اخيرا اختفى صوت الأستاذ و انطرش صوت الجرس طرش بالمدرسه.. هاد الصوت بآخر حصه بمثابة النشيد الوطني للطلاب.. و لما يكون يوم الخميس متل هاليوم بيكون اهم من 

جرس الانذار تبع الحريق.. يلي ما في منو طبعا بمدارسنا.. 

طلع من الصف يهدوء عكس باقي الطلاب يلي عم تطلع بشكل هيستيري و ما حدى شايف الأستاذ.. نسوه و لساتو جوى..

قميصو فوق البنطلون و العرق لساتو عم يشر و مبقع علقميص تبعو ..الشباب عم تركض عمدرسة البنات منشان يستنو اخواتن و منن حبيباتن و من جايه يتعرف على وحده منشان يناديلها أختي بالأول و بعدين حبيبتي.. ما علينا.. الدنيا شوب و شمس كتير ..العدو اللدود.. بيكره الشمس و الشوب كتير.. مرق من جنب مدرسة البنات و ما اطلع فيها.. ما كان تهموا المغامرات العاطفيه.. شنتايه على كتف واحد و قشره مليانه بشعروا الأسود الطويل يلي أموا و ابوا بيفوتوا معوه بمفاوضات طول السنه منشان يحلقوا.. بس هو بيكره الحلاقين.. خصوصي هاد يلي جنب الجامع يلي بيحلق لأبو.. يا ما نازعلو شعراتو هو و صغير و مضحك عليه البنات بمدرسة الإبتدائي ..بعد ما قطش مدرسة البنات بلشت ريحة الفلافل بالأجواء.. هو بيحب الفلافل. كتير جوعان.. شاف واحد من!! طلاب صفو عم يندهلو.. اتفضل ..من بعيد ابتسم و قلو صحه حبيب.. بطل يشتري فلافل ..اصلا الزيت تبعها مقلي فيه خمسين مره و اصلا هاد زيت سيارات و اصلا.. بس يا اخي طيبه.. كمل طريقو كالعاده متل كل يوم خميس في شلة الطابه طبعا ما حدى كان يعزمو عاللعب لسببين.. لانو شافو كيف بيلعب بحصة الرياضه و هو ايدو بجيبتو عطول.. و التاني لانو كانوا يعرفوا عنو شي غير انو هاد الطالب معنا بالصف و بيعرفو اسمو و مقعدوا..."حووول معلم.. " كلمه تقال للأدب و الكل عم يطلع هو و خايف على جوابوه ..فيك تشوف من نظرات عيونن "لك و لييي على هالورطه بس ما يجي يخربلنا اللعبه "....رد لا شكرا بدي روح عالبيت ..يا هل ترى كمان هداك يلي عزموا عصندويشة الفلافل كان عم يتصنع و منشان الأدب... اديشنا شعب مؤدب..اذا ما بدك ياني العب معك ليش عم تعزمني و اذا مو حابب تدفع خمسة عشر ليره لاكول معك ليش لتناديلي... شو السبب؟ من شو بنخجل تحديدا؟ ما علينا.. شمس و حمى بعز دين البرد.. في حارتين جنب بعد وحده طويله ووحده قصيره.. دائما بيفوت بالطويله لانو فييي و ما بحب هديك الحاره لانو ذكرياتو فيها بتقرف.. مره بكى وحده بالإبتدائي فيها و ضاعت ميه مره كانت امو باعتو تشتري غراض فيها.. خلينا عالطويله احسن.. مرق من جنب الجامع.. اصحاب المحلات قاعده عالكراسي متل جمهور السينما كلو عم يطلع عليك من فوق لتحت.. بحياتو ما فهم ليش او بشو ليكونوا عم يفكروا.. كلو قاعد عالكراسي و حاطط كاسات الشاي.. كل مره بيمرق ما بيقول السلام عليكم.. مع انو لازم يقولها من وجهة نظروا ليطبق السنه "و أفشوا السلام بينكم " بس و الله ما بيحسن.. يا أخي بيكره العالم.. كلو عم يطلع و كلو قاعد لا شفله و لا عمله.. و اخيرا وصل على رصيف بينايتو و تحتها كلها محلات و كلو حاطط.كراسي متل هنيك ..كمان ما سلم.. طلع مفاتيحو و فتح باب البنايه و ميت فكره براسو.. بس كان يوم متل كل يوم.. ممل.. عادي.. سخيف و يوم الأحد لح يكون نفس هاد اليوم و يوم التنين ..الشغلات المتأكد منها انو امه هلأ بالمطبخ عم تعمل فطور و اخوه بلش بوظايفو و اختو علتفزيون.. بيتون عالي ..لسا لح يرد ينزل هو متأكد انو أمو لح ترجعو لتحت ليكب زباله.. كمان مفاوضات يوميه و جدال يومي على مين لازم يكبها هو و لا أخو.. وصل عالببت و فتح الباب و قال السلام عليكم.. بس البيت كان فاضي.. هاد مو بيتو و طلع عالمطبخ ما كان في غير الجلي المكوم من انبارح و فات بصباتو الوسخ على غرفة التلفزيون ..صمت.. صفن بالكنبايه يلي جنبو ..و اخيرا قرر يشلح و يغير اواعي.. شلح و زت بالأرض و شاف الدفاتر ملحوشه بكل مكان.. فات اتحمم من ريحة عرق الشغل و كانت الساعه وحده بالليل ..كان هداك يوم و هاد يوم..الفرق كم سنه بس.. و اليومين عاديين كتير.. روتيني متل كل الأيام و سخيف و مقرف... بس مدري ليش حس انو هديك الأيام أحلى.......


2
0
0

Anonymous {{ comment.name }} {{ comment.date }}
{{ comment.text }}
Anonymous {{ sub_comment.name }} {{ sub_comment.date }}
{{ sub_comment.text }}